⦾  هەنجیر یەکێکە لە میوە وەرزییەکان و لە چەندین ناوچەی جیهاندا بوونی هەیە و بڵاو بووەتەوە، بەتایبەت لە ناوچەکانی کیشوەری ئاسیا و ناوچەکانی دەوروپشتی دەریای سپی ناوەڕاست. ئەم جۆرە میوەیە لەلایەن مرۆڤەوە وەک سەرچاوەیەکی خۆراک لە سەرجەم تەمەنەکاندا سوودی لێ دەبینرێت. وە بەهۆی شیرینی و تامە خۆشەکەی و تایبەتمەندییە زۆرەکانییەوە لە چارەسەری چەندین نەخۆشیدا و ڕێگری کردن لە چەندانی تر سوودی لێ دەبینرێت.

⦾ هەنجیر درەختێکی قەبارە مام ناوەندە و بەرزییەکەی دەگاتە ٣ بۆ ٩ مەتر. لە هەندێک کاتدا (لە هەندێک کەشوهەوای تایبەتدا)، هەنجیر توانای هەیە تاکوو بەرزی ١٥ مەتر گەشە بکات.

⦾ هەنجیر گەڵایەکی گەورەی هەیە کە دابەش کراوە بۆ ٣ پل و بە ئاسانی دەناسرێتەوە.

⦾ ڕەگی هەنجیر دەکەوێتە نزیک ڕووی زەوی و بە نزیکەی ٣ هێندەی تاجەکەی فراوان دەبێت.

⦾ هەندێک جۆری هەنجیر وەکو ئەوانەی کە دەکەونە باشووری ئەفریقا، ڕەگێکی قووڵی بڕواپێنەکراویان هەیە بە جۆرێک قووڵترین ڕەگ کە تۆمار کرابێت زیاتر لە ١٢٠ مەتر قووڵە.

⦾ بەگشتی هەنجیرەکان لەسەر بنەمای جۆری گوڵ و ڕێگەی زۆربوونیان دابەش دەکرێن بەسەر چوار کۆمەڵەدا.

⦾ جگە لەڕێگەی تۆو کردن، هەنجیرەکان لەڕێگەی قەڵەم کردنیشەوە زیاد دەبن کە بە بەراورد بە ڕێگەی تۆو کردن زۆر خێراترە.

⦾ هەنجیر دەوڵەمەندە بە ڕیشاڵ و ڤیتامین و کانزاکان کە تام و بۆنێکی خۆشیان پێ بەخشیوە. وە دەتوانرێت بە کاڵی یان بە وشککراوی بخورێت یاخود وەک بەشێک لە ژەمە خۆراکی شیرین و سوێر بخورێت.

⦾ هەنجیر چەندین سوودی تەندروستی گرنگی هەیە بە جۆرێک بەهۆی بوونی چەندین کانزاوە تێیدا بەتایبەت ئاسن، سوودێکی باشی هەیە بۆ بەهێزکردنی خوێن و ڕێگرتن لە کەم خوێنی.

⦾ بەهۆی بوونی بڕێکی زۆر لە کانزای کالسیۆم و مەگنیسۆم لە پێکهاتەکەیدا سوودێکی باشی هەیە لە بەهێزکردنی ئێسقانەکان و گەشەی جەستەدا.

⦾ بەگشتی میوەی هەنجیر لەسەر چڵ و پۆپەکانی درەختەکە بەرهەم دێت، بەڵام هەندێک جۆری تایبەتی هەنجیر لە فلیپین بوونی هەیە کە توانای ئەوەی هەیە لە قەدەکەوە میوە بگرێت.

⦾ بەگشتی هەنجیرەکان دەتوانن ماوەی ٣٥ ساڵ زیندوو بمێننەوە.