ئایینی پیرۆزی ئیسلام چەندین مافی بۆ منداڵ دیاری کردووە کە لە خوارە ئاماژە بە چەند دانەیەکیان دەکەین:

⦾  مافی خۆیەتی خاوەنی دایک و باوکێکی باوەڕدار بێت بە خودای گەورە لە جێبەجێ کردنی ڕێسا و فەرمانەکاندا، وە ئەمەش بە دەست نیشان کردنی هاوسەرێکی باش و باوەڕدار دەبێت لە لایەن دایک و باوکەکەوە.

⦾ شیرینکردنی مەڵاشووی بە شیرینییەک وەکو خورما و پاشان لە ئامێزگرتنی.

⦾ پێدانی شیری دایک، کە گرنگی و سوودێکی باشی تێدایە بۆ منداڵ.

⦾ مافی خۆیەتی بە سەربڕینی ئاژەڵێک بۆی، ئەویش دوو مەڕ بۆ کوڕ وە مەڕێک بۆ کچ، ئەمەش لە سوننەتی پێغەمبەردا هاتووە (صلی اللە علیە وسلم).

⦾ مافی خۆیەتی کە یاری لەگەڵ بکرێت و بە نەرم و نیانییەوە مامەڵەی لەگەڵ بکرێت.

پەروەردەکردنی منداڵ لە ئیسلامدا

⦾ فێرکردن و ناساندنی منداڵ بە بیروباوەڕی دروستی ئیسلام و پەیوەست کردنی دڵ و دەروونی بە خودا و ئیسلامەوە.

⦾ ئامۆژگاری و ڕێنیشاندانی بەردەوام و ڕاهێنانی لەسەر کاری خێر و چاکە کردن.

⦾ چاودێری بەردەوامی ڕەفتار و ڕاستکردنەوەی هەڵەکانی هەنگاو بە هەنگاو، پێش ئەوەی بگاتە قۆناغێک کە ڕاستکردنەوەی هەڵە و وازلێهێنان لە تاوان قورس ببێت.

⦾ هەوڵدان بۆ پاراستنی چاو و گوێ و تەواوی جەستەی لە حەرام و دوورکەوتنەوە لە کاری نەشیاو.

مافە دەروونی و جەستەیییەکانی منداڵ لە ئیسلامدا

⦾ لە مافە دەروونییەکانی منداڵ ئەوەیە کە لە ماڵێکی پڕ لە ئارامی و خۆشی بژی لەگەڵ دایک و باوکیدا، کاتێک منداڵەکە گەورە بوو و بینی کە خۆشەویستی و خۆش گوزەرانی بەرپایە لە نێوان دایک و باوکی، ئەمەش کاریگەرییەکی باشی لەسەر دەبێت و لە هەڵسوکەوتیدا ڕەنگ دەداتەوە

⦾ لە مافە جەستەیییەکانی منداڵ ئەوەیە کە لە هەموو نەخۆشی و کارەساتێک بیپارێزن.

⦾ بەردەوام دوعای باش و ڕێی ڕاستی بۆ بکەن.

⦾ ئامانەتی خودای بکەن کە لە پارێزراوی ئەودا بێت و بیپارێزێت لە هەموو خراپەیەکی مادی و مەعنەوی کە دێتە ڕێگەی.